काठमाडौं । महिला सहयात्रा लघुवित्त वित्तीय संस्थाले र घरेलु लघुवित्त वित्तीय संस्थालाई प्राप्ति गर्न हस्ताक्षर भएको छ । सो सम्बन्धि सम्झौता(एमओयू) मा आइतवार दुई कम्पनीबीच हस्ताक्षर भएको हो ।
मकवानपुर जिल्लाको चित्लाङमा केन्द्रीय कार्यालय रहेको महिला सहयात्रा लघुवित्त वित्तीय संस्थाको रू.१२ करोड १० लाख चुक्तापूँजी रहेको छ भने २१ जिल्लामा ३४ शाखा सञ्जाल रहेको छ ।
त्यसैगरी काभ्रेको बनेपा–८ मा केन्द्रीय कार्यालय रहेको घरेलु लघुवित्त वित्तीय संस्थाको चुक्तापूँजी रू.७ करोड रहेको छ । ११ जिल्लामा १३ ओटा शाखाबाट वित्तीय सेवा प्रदान गर्दै आएको उक्त कम्पनीले हालसम्म सर्वसाधारणलाई शेयर वितरण गरेको छैन ।
प्राप्तिपछि कम्पनीको नाम महिला सहयात्रा घरेलु वित्तीय संस्था रहने छ भने चुक्तापूँजी रू. २० करोड पुग्ने छ । प्राप्ति गर्ने सम्वन्धमा नेपाल राष्ट्र बैंकबाट जारी बैंक तथा वित्तीय संस्थाहरुले एक आपसमा गाभ्ने र गाभिने तथा प्राप्ति (एक्विजिसन) र विलय (मर्जर) सम्वन्धी नियमावली २०७३ (चौथो संशोधन २०७५) को विनियमावली ५ बमोजिम दुई कम्पनीबीच सम्झौता पत्रमा हस्ताक्षर भएको हो ।
तीन महीनाभित्र प्राप्ति हुने गरि दुई कम्पनीबीच सम्झौता भएको बताइएको छ । महिला सहयात्रा वित्तीय संस्थाका कार्यवाहक अध्यक्ष शान्तिलक्ष्मी श्रेष्ठले महिलाहरुले लगानी गरेको महिला सहयात्राले महिलाको आर्थिक अवस्था उकास्ने आगामी दिनमा विशेष ध्यान दिने बताएकी छन् ।
वि.सं.२०७६ फागुन ११ आइतवार २१:०१ मा प्रकाशित
