काठमाडौं । राधाकृष्ण कृषि सहकारी संस्था लिमिटेड बेनी नगरपालिका वडा नं. २ म्याग्दीका शेयर सदस्यहरुका लागि आयोजना गरिएको २ दिने सहकारी सचेतना कार्यक्रम बुधवार सम्पन्न भएको छ ।
सहकारीको उद्देश्य अनुसार काम गर्न सदस्यहरुलाई सक्रिय बनाउने उद्देश्यका साथ तालिमको आयोजना गरिएको संस्थाले जनाएको छ । वडा भित्रका सम्पूर्ण बासिन्दालाई सहकारीमा आवद्ध गराई कृषि तथा उद्यमशिलतामार्फत आर्थिक रुपमा सम्पन्न बनाउने लक्ष्यका साथ स्थापित संस्थाले तालिमको पहिलो दिन बेनी नगरपालिका वडा नंं २ भकुण्डेमा र दोस्रो दिन खबरामा तालिम सञ्चालन गरेको हो ।
तालिममा सहजीकरण गर्दै राष्ट्रिय सहकारी बैंकका सञ्चालक रामबहादुर जिसीले सहकारी ऐन अनुसार सबै सहकारीले मुख्य कारोबारका रुपमा आफ्नो उद्देश्य अनुसारको काम गर्नु पर्नेमा जोड दिनुभयो ।
कृषि सहकारीले बचत तथा ऋण मात्र गर्ने अवस्थाको अन्त्य गरी कृषि क्षेत्रमा बढी भन्दा बढी लगानी गरी सदस्यहरुलाई आयआर्जनमा केन्द्रीत गर्नु पर्ने उहाँको सुझाव थियो ।
कार्यक्रममा बेनी नगरपालिका वडा नं. २ का वडा अध्यक्ष हिरा बहादुर थापा, नगर कार्यकालिका सदस्य गौमती नेपाली लगायतले सहकारीमार्फत सदस्यहरुलाई उत्पादनमा जोड्नु पर्नेमा जोड दिनुभएको थियो ।
संस्थाका अध्यक्ष भद्रबहादुर कार्कीले संस्थाको समग्र अवस्थाका बारेमा जानकारी गराउनु भएको थियो । कृषि क्षेत्रमा लागेका सदस्यहरुलाई ब्याज छुट तथा उत्पादनका आधारमा अनुदानको व्यवस्था गरिएको अध्यक्ष कार्कीले बताउनुभयो ।
कृषि ज्ञान केन्द्र पर्वतसंगको सहकार्यमा कृषि उत्पादनमा लागेका २० जना शेयर सदस्यहरुलाई २ लाख सम्मको कृषि सामग्री प्रदान गरिएको, कृषकहरुलाई आवश्यक रासायनिक मल, विउ विषादी तथा कृषि औजारहरु सुपथ मूल्यमा उपलब्ध गराई सदस्यहरुलाई कृषि पेशातर्फ आकर्षित गराउने काम संस्थाले गर्दै आएको उहाँको भनाइ थियो ।
तालिममा कृषि सहकारीले गर्नु पर्ने काम, सहकारी ऐन तथा नियममा भएको व्यवस्था, कृषि सहकारीमार्फत उद्यमशिलताको विकास, सहकारीमा सदस्यहरुको काम कर्तव्य र अधिकार लगायतका विषयमा राष्ट्रिय सहकारी बैंकका सञ्चालक रामबहादुर जिसीले सहजीकरण गरेको सचिव सोवित शर्माले जानकारी दिनुभयो ।
१ सय ४५ जना अगुवा कृषकहरु शेयर सदस्य रहेको संस्थो भैसीपालन, बाख्रापालन, तरकारी खेती, कुखुरापालन, महिला कृषि उद्यम लगायतका क्षेत्रमा ३ करोड ५० लाख रुपैया कर्जा लगानी गरेको संस्थाका कोषाध्यक्ष मिना शर्माले जानकारी दिनुभयो ।
वि.सं.२०७६ फागुन २२ बिहीवार ११:५९ मा प्रकाशित
