काठमाडौं। माछापुच्छ्रे बैंकका प्रमुख कार्यकारी अधिकृत बाहिरिन लाग्नुभएको छ । चार वर्षका लागि माछापुच्छ्रे बैंकको प्रमुख कार्यकारी अधिकृत पदमा नियुक्त हुनुभएका सुमन शर्मा पारिवारिक कारण देखाउँदै बाहिरिन लाग्नुभएको हो ।
करिब दुई वर्ष अघि प्रमुख कार्यकारी नियुक्त हुनुभएको शर्मा फागुन मसान्तबाट औपचारिक रूपमा बाहिरिने योजनामा रहनुभएको बताइएको हो । उहाँ बाहिरिएसँगै कामु प्रमुख कार्यकारी अधिकृतमा नायव प्रमुख कार्यकारी सन्तोष कोइरालाले जिम्मेवारी सम्हाल्नुहुने पनि बताइएको छ ।
सन् १९९७ मा नेपाल एसबिआइ बैंकमा अधिकृतस्तरबाट बैंकिङ करियर सुरु गर्नुभएका शर्माको बैंकिङ क्षेत्रमा करिब २२ वर्षको अनुभव रहेको छ । शर्माले एनएमबि बैंकको सहायक महाप्रबन्धक भएर पनि काम गर्नुभएको छ । ग्लोबल आइएमइ बैंकमा कार्यरत शर्मा २३ महिना अघि माछापुच्छ्रे बैंकको प्रमुखमा नियुक्त हुनुभएको थियो । सो भन्दा अघि पनि शर्मा माछापुच्छ्रे बैंककै नायव प्रमुख कार्यकारी अधिकृतको भुमिकामा रहनुभएको थियो । प्रमुख कार्यकारी अधिकृतको रुपमा कार्यरत शर्माले शाखा सञ्जाल विस्तार, निक्षेप संकलन र ऋण लगानीमा आक्रामक रुपमा कार्य अघि बढाउनुभएको छ । शर्माले छोटो समयमै बैंकको शाखा ६० वटाले बढाउनुभएको थियो ।
यता कामु प्रमुख कार्यकारी अधिकृतको जिम्मेवारी सम्हाल्न लाग्नुभएका कोइराला २१ वर्षदेखि बैंकिङ क्षेत्रमा कार्यरत रहनुभएको छ । उहाँ माछापुच्छ्रे बैंकमा दुई वर्षदेखि नायव प्रमुख कार्यकारी हुनुहुन्छ । यसै बैंकमा ७ वर्ष बिताइसक्नुभएका कोइरालाले बैंक अफ काठमाण्डूबाट करियर सुरु गर्नुभएको हो ।
वि.सं.२०७६ फागुन २८ बुधवार १५:४९ मा प्रकाशित
