धादिङ । अख्तियार दुरुपयोग अनुसन्धान आयोगको टोलीले शुक्रबार धादिङ मालपोत कार्यालयमा स्टिङ अप्रेसन गरेको छ । अप्रेशनमा एक कर्मचारी र एकजना लेखन्दास पक्राउ परेका छन्।
शुक्रबार ११ बजे मालपोत कार्यालय पुगेको अख्तियार टोलीले जग्गा रजिष्ट्रेसन फाँटमा खरिदार पदमा करार सेवामा कार्यरत नीलकण्ठ नगरपालिका–३ का सूर्य अधिकारी र श्रेष्ठ भू–सेवा केन्द्रका लेखापढी व्यवसायी कान्छोनारायण श्रेष्ठलाई पक्राउ गरेको हो ।
एक सहकारी संस्थाको जग्गा फकुवासम्बन्धी फाइलमा घुस मागेपछि लेखापढी व्यवसायी श्रेष्ठमार्फत अधिकारीले १७ हजार ५ सय नगद बुझेलगत्तै अख्तियार टोलीले दुवैजनालाई नियन्त्रणमा लिएको हो ।
रकम बरामद गरेको मुचुल्कामा अख्तियार टोलीले नीलकण्ठ नगरपालिका(३ का वडा अध्यक्ष होमनाथ रिजाललाई पनि साक्षी राखेको छ । अख्तियारको टोलीले कर्मचारी र लेखापढी व्यवसायी नियन्त्रणमा लिएलगत्तै मालपोत कार्यालयका सबै कर्मचारी मध्यान्ह १२ बजे नै कार्यकक्ष छाडेर निस्केका थिए ।
कार्यालय प्रमुख मालपोत अधिकृत पुरुषोत्तम भण्डारी गत २७ गतेदेखि नै बिदामा बसेका छन्। शुक्रबार भएको कारण ३ बजे बिदा हुनुपर्ने कार्यालय मध्यान्हदेखि नै कर्मचारीविहीन भएपछि काम भइसकेका सेवाग्राही पनि कागजपत्र लिन नपाएर अन्यौलमा परेका थिए ।
अख्तियारले छापा मारेपछि निमित्त कार्यालय प्रमुख रोशन गिरिसहित सेवाग्राहीको काम छोडेर कार्यकक्ष बाहिर निस्किए गएपछि सेवाग्राही मर्कामा परेका हुन् । नियन्त्रणमा लिएको दुवैजनालाई अख्तियार टोलीले काठमाडौं लगेको छ ।
वि.सं.२०७६ फागुन ३० शुक्रवार १९:५९ मा प्रकाशित