बागलुङ । बागलुङमा भारतबाट आएका थप १० जनालाई कोरोना संक्रमण पुष्टि भएको छ । भारतबाट आएर जिल्लाका विभिन्न क्वारेन्टाइनमा बसेका १० जनामा कोरोना संक्रमण पुष्टि भएको स्वास्थ्य कार्यालय बागलुङका प्रमुख सुरज गुरौले जानकारी दिए ।
पोखराको स्वास्थ्य विज्ञान प्रयोगशालामा गरिएको परीक्षणमा बडिगाड गाउँपालिकाका चार जना, निसीखोला गाउँपालिकाका तीन जना र गलकोट नगरपालिकाका तीन जनामा संक्रमण पुष्टि भएको हो ।
संक्रमित हुनेमा बडिगाड गाउँपालिकाका १६, २०, २१ र २५ वर्षीय पुरुष, निसीखोला गाउँपालिकाका ३ वर्षीया बालिका, २२ र २९ वर्षीय पुरुष र गलकोट नगरपालिकाका २०, २२ र २३ वर्षीय पुरुषमा संक्रमण पुष्टि भएको छ ।
केही दिन अगाडी तमानखोला गाउँपालिकाका ४ जना बडिगाड गाउँपालिकाका २ जना गरी ६ जनालाई कोरोना संक्रमण पुष्टि भएको थियो ।
उनीहरुलाई धौलागिरि अस्पताल बागलुङको आइशोलेसन कक्षमा राखिएको छ ।
योसँगै बागलुङमा कोरोना संक्रमितको संख्या १८ पुगेको छ भने २ जना निको भएर घर फर्किएका छन् ।
वि.सं.२०७७ जेठ २२ बिहीवार ०९:०२ मा प्रकाशित
