सानफ्रान्सिस्को । अमेरिकी संघीय उड्डयन प्रशासन –एफएए) ले बोइङ– ७३७ म्याक्स श्रृंखलाका विमानहरु पुन स् उडानका लागि परीक्षण गर्न सोमवार अनुमति दिएको छ । एकपछि अर्को विमान दुर्घटनाग्रस्त हुन थालेपछि एफएएले म्याक्स श्रृंखलाका विमान उडाउन प्रतिबन्ध लगाएको थियो ।
एफएएद्वारा जारी वक्तव्यमा बोइङ –७३७ म्याक्स विमान सोमवार सियाटलको बोइङ फिल्डबाट पहिलो चरणको परीक्षणका लागि उडान गरेको उल्लेख छ । संघीय प्रशासन र बोइङ कम्पनीबीच बिमानको स्वचालित फ्लाइट कन्ट्रोल सिस्टम परीक्षण गर्न यस साता परीक्षण उडानहरु गर्न सहमति भएको थियो ।
अधिकारीहरुका अनुसार संघीय प्रशासनले तोकेका कार्यविधि पूरा भए नभएको बारेमा जाँच गर्न परीक्षण उडानको अनुमति दिइएको हो । तर यी उडानको सफलतापछि पनि तत्कालै विमानलाई आमजनताको सेवाका लागि प्रयोगमा ल्याइने छैन । अरु केही प्राविधिक परीक्षण पनि गर्नुपर्ने एफएएको भनाइ छ ।
एफएएले सम्पूर्ण प्राविधिक जाँच सम्पन्न भएर सन्तोषजनक नतिजा प्राप्त भएपछि मात्र उडान अनुमति दिइने बताएको छ । बोइङको ७३७ म्याक्स जेटहरु गत वर्ष मार्चदेखि नै विश्वभर उडान प्रतिबन्धित छन् र जहाजहरु विमानस्थलहरुमा थन्किएका छन् ।
एक वर्षभित्रै दुई ओटा विमान दुर्घटना भएपछि विश्वका विभिन्न देशले यो जहाजको उडानमा प्रतिबन्ध लगाएका थिए । अनुसन्धाताहरुले विमानको फ्लाइट कन्ट्रोल सफ्टवेयरमा समस्या आएका कारण विमान दुर्घटना हुने गरेको अनुमान गरेका छन् । रासस/सिन्ह्वा
वि.सं.२०७७ असार १६ मंगलवार १४:४६ मा प्रकाशित