काठमाडौं । गोरखा र चितवनको दोसाधस्थित त्रिशूली नदिमा ब्लयू इनर्जी लिमिटेडले निर्माण गर्न लागेको सुपर त्रिशुली जलविद्युत आयोजनाका लागि नेपाली सात बैंकले ऋण लगानी गर्ने भएका छन् ।
नेपालइन्भेस्टमेन्ट बैंकको अगुवाईमा ब्ल्यू इनर्जी लिमिटेडले निर्माण गर्न लागेको १०० मेगावाटको सुपर त्रिशूली जलविद्युत आयोजनालाई सात बैंकले १२ अर्ब १८ करोड ऋण लगानी गर्ने भएका हुन् ।
उक्त आयोजनाका लागि इन्भेस्टमेन्ट बैंकसहित कुमारी बैंक, ग्लोबल आइएमई बैंक, एभरेष्ट बैंक, हिमालयन बैंक, नेपालएसबीआई बैंक र नबिल बैंकले ऋण लगानी गर्ने भएका हुन् ।
आयोजना निर्माणमा वित्तिय व्यवस्थनका लागि सराफ समूहका कार्यकारी निर्देशक बरुण सराफ र बैंकहरूका प्रतिनीधिहरुबीच सम्झौतामा हस्ताक्षर समेत भएको छ । उक्त आयोजनामा सराफ समूहको लगानी छ ।
१६ अर्ब २४ करोड ६६ लाख रुपैयाँलागतअनुमानगरिएको आयोजना निर्माणका लागि सात बैंकहरुले १२ अर्ब १८ करोड ४९ लाख रुपैयाँ ऋण लगानी गर्ने सराफ समूहका कार्यकारी निर्देशक बरुण सराफले बताउनुभयो ।
उहाँकाअनुसार उक्त आयोजना स्वदेशी बैंक तथा वित्तीय संस्थाहरुबाटै ऋण लगानी जुटेको १०० मेगावाटभन्दा माथिका आयोजनामध्ये निजी क्षेत्रबाट प्रवद्र्धित एक ठूलो आयोजना पनि हो । जुन चार वर्षभित्र सम्पन्न गर्ने लक्ष्य लिएको छ ।
सन् २०२१ को नोभेम्बरसम्ममा मुख्य निर्माणको कार्य सुरु गरिने निर्देशक सराफले जानकारी दिनुभयो । सराफ समूहले २३.५ मेगावाटको अपर सोलु जलविद्युत आयोजना सम्पन्न गरिसकेको जनाएको छ ।
निर्माणका लागि सिभिल तथा हाइड्रो मेकानिकलतर्फको ठेकेदार छनोटको प्रक्रिया अन्तिम चरणमा पुगेको कम्पनीले जनाएको छ ।
आयोजनाबाट उत्पादन हुने विद्युत् मार्किचोक सबस्टेसनमा जोडिने छ । सबस्टेसनसम्म १८ किलोमिटर लामो २२० केभी डबल सर्किट प्रसारण लाइन उक्त सवस्टेनमा जोडिने कम्पनीले जनाएको छ ।
वि.सं.२०७७ फागुन १४ शुक्रवार ११:१८ मा प्रकाशित
