काठमाडौं । काठमाडौं महानगरकाका मेयर विद्यासुन्दर शाक्यले महानगरले पुननिर्माण गरिरहेकोे कमल पोखरीका बारेमा धेरै भ्रम सिर्जना गरेको दाबी गर्नुभएको छ । काठमाडौंका स्थानीय जनता, भाषा तथा जाति सम्बन्धी खलः पुचःहरूलाईसमेत भ्रमित तुल्याउन खोजिएको दाबी गर्नुभएको हो ।
‘अहिले कमलपोखरीको मौलिकता बचाउने नारा लागिरहेको छ, यसको मौलिकता के हो हामीलाई दिनुस् भन्दा पुरातत्व विभाग आफूलाई थाहा छैन भन्छ’ उहाँले भन्नुभयो ‘कमल पोखरी पुनर्निर्माण गर्दा त्यहाँको वातावरण कसरी बिग्रियो भन्दा त्यसको तथ्यमा उत्तर कसैले दिँदैन । यस प्रकारको विरोधलाई कसरी बुझ्नु ? यो त विरोधका विरोध मात्र हो ।’
पोखरी पुननिर्माण गर्दा क्षेत्र बढाउन लागिएको प्रसङ्ग उल्लेख गर्दै शाक्यले महानगरपालिकाले कमलपोखरी बिगार्न वा नास्न नखोजेको उल्लेख गर्नुभयो । पहिलेभन्दा पोखरीको आकार बढाउन डिलमा रहेको प्रहरी वृत्त स्थानान्तरण गरिसकिएको छ । क्लबको भवन हटाउने काम सकिएको उहाँको भनाई छ । राजनीतिक अभिष्ट भएका मानिसहरू अहिले सम्पदा अभियन्ताको खोल ओढेर विरोधमा आएको महसुस भएको उहाँको तर्क छ ।
मेयर शाक्यले कमी कमजोरी भएको भए तथ्यमा औल्याउन समेत आग्रह गर्नुभयो । ‘स्थानीय सांस्कृतिक जीवनलाई जोगाउन हामी लगानी गर्छौं’ उहाँले भन्नुभयो ‘बर्षौंदेखि आएका चलनलाई बचाउन पाटी, सत्तललगायत सांस्कृतिक संरचना निर्माण गर्छौं । हामी सम्पदा बनाउँदै जाने, अनि सम्पदा बचाउँछौं भनेर जिम्मा पाएका निकाय तिनै संरचनालाई भाडा लगाएर आय गर्ने गरिरहेका छन् । अब हामी यसो हुन दिँदैनौं ।’
पुरातत्व विभागले काम गर्न रोक्ने र त्यसको अपजस महानगरले व्यहार्नु परेको उनको भनाइ छ । विवाद सिर्जना गरेपछि त्यसको दायित्व लिन कुनै पनि निकाय अगाडि नसरेको उहाँले बताउनु भयो । ‘हामीले हनुमान ढोका दरबार क्षेत्रमा पुरातत्व विभागले हेर्ने संरचनामा व्यापार नगर्न पत्राचार गरेका छौं’ उहाँले भन्नुभयो ‘यसमा उसको प्रतिक्रिया पर्खिरहेका छौं ।’– प्रशिक्षार्थी पत्रकार
वि.सं.२०७७ फागुन १७ सोमवार १०:४६ मा प्रकाशित
