काठमाडौं । गैरआवासीय नेपाली संघ र राष्ट्रिय पुनर्निर्माण प्राधिकरणका प्रतिनिधिहरुले लाप्राक नमूना बस्तिको निरिक्षण भ्रमण गरेका छन् ।
गैरआवासीय नेपाली संघका अध्यक्षको नेतृत्वमा संघका एक प्रतिनिधि मण्डल र राष्ट्रिय पुनर्निर्माण प्राधिकरणका सचिव मणिराम गेलालले निर्माणाधिन लाप्राक नमूना बस्तिको निरक्षण भ्रमण गर्नुभएको हो । भ्रमणमा उहाँहरुसहित भ्रमण २० जनाको सहभागिता रहेको थियो ।
सो अवसरमा गैरआवासीय नेपाली संघका अध्यक्ष कुमार पन्तले संघको अथक प्रयास र परिश्रमबाट यो बस्ति निर्माण भएकोले यसप्रति संधै संघको लगाव रहने र भविष्यमा पनि यस बस्तिमा गैरआवासीय नेपालीहरुको आगमन निरन्तर रहेने बताउनुभयो ।
उहांले लाभग्राहिरुलाई लालपूर्जा उपलब्ध गराउने र पूर्वाधार निर्माणमा समेत संघले प्राधिकरणलाई घचघचाई रहेको जानकारी गराउंदै १२ बैशाख २०७८ मा अधिकारिक रुपमा बस्ति हस्तान्तरण गर्ने कार्यक्रम तय भएकोले सो समय भित्रै बस्ति निर्माणका अन्तिम कामहरु सम्पन्न गर्न लाभग्राहिहरुलाई सचेत गर्नुभयो । उहाँले बस्ति निर्माणमा सहयोग गर्ने राष्टिय पुनर्निर्माण प्राधिकरण, शहरी बिकास मन्त्रालय, गैरआवासीय नेपालीहरु, केयर नेपाल, नेपाली सेना, लाभग्राहिहरु र गाउंपालिका तथा वडा कार्यालयलाई धन्यवाद व्यक्त गर्नुभयो ।
सोही अवसरमा बस्ती निर्माण छिटै सम्पन्न हुनेमा लाभग्राहिहरु विश्वस्त भएका छन् परियोजनाका सहसंयोजक, श्याम तामाङ्गले, बस्ति निर्माण सम्बन्धि भएका प्रगतिहरु बारे जानकारी गराउंदै बांकी काम एक महिना भित्र सहजै सम्पन्न गर्न सकिने विश्वास व्यक्त गर्नु भयो ।
त्यस्तै, राष्ट्रिय पुनर्निर्माण प्राधिकरणका सचिव, मणिराम गेलालले, बिभिन्न कठिनाईका बावजुत पनि यस्तो सुन्दर बस्ति निर्माण गरिदिएकोमा सम्पूर्ण गैरआवासीय नेपालीहरुलाई धन्यवाद व्यक्त गर्दै राष्ट्रिय पुनर्निर्माण प्राधिकरणका तर्फबाट पूर्वधार विकासको लागि प्रति लाभग्राहि प्राप्त हुने ४ लाख रुपैयाँ अनुदान दिन प्राधिकरण कटिवद्ध रहेको बताउनुभयो । साथै त्यस मध्य एक करोड ३५ लाखको लागतमा बस्तिको दक्षिण तर्फको रिटेनिङ्ग वाल र नाला निर्माण गरिसकेको अवगत गराउनुभयो ।
वि.सं.२०७७ फागुन २० बिहीवार १७:२३ मा प्रकाशित
