काठमाडौं । नेपालमा बेसार तथा यसका कच्चा पदार्थको आयात ६२.६३ प्रतिशतले बढेको छ । गत आर्थिक वर्ष आठ महिनाको तुलनामा चालु आवको सोही अवधिमा बेसारको आयात ६२.६३ प्रतिशतले बढेको भन्सार विभागको तथ्याङकले देखाएको छ ।
विभागको तथ्याङ्क अनुसार गत आवको फागुन मसान्तसम्म २२ करोड २४ लाख ६६ हजार रुपैयाँको बेसार तथा यसको कच्चा पदार्थ आयत भएको थियो । जसमध्ये ९८ लाख १० हजार रुपैयाँ बराबरको १ लाख ५ हजार २९ किलो ताजा बेसार, ३ करोड ४ लाख १३ हजार रुपैयाँ बराबरको १ लाख ८४ हजार ८२ किलो धुलो बेसार र १८ करोड २२ लाख ४४ हजार रुपैयाँको बेसारजन्य कच्चा पदार्थको आयात भएको विभागको तथ्याङ्कमा उल्लेख छ ।
चालु आर्थिक वर्षको आठ महिनामा बेसार आयात ६२.६३ प्रतिशतले वृद्धि भई ३६ करोड १८ लाख ८ हजार रुपैयाँ पुगेको छ ।
विभागका अनुसार चालु आवको साउनदेखि फागुन महिनाको अन्त्यसम्ममा ४ करोड ६७ लाख २८ हजार रुपैयाँ बराबरको ३ लाख ८७ हजार १९४ किलो ताजा बेसार आयात भएको देखिन्छ ।
जसमध्ये ३ करोड ५७ लाख ८० हजार रुपैयाँ बराबरको २ लाख १४ हजार ८७९ किलो धुलो बेसार र २७ करोड ९३ लाख रुपैयाँ बराबरको २२ लाख ८ हजार ७ किलो कच्चा पदार्थ आयात भएको विभागले जनाएको छ ।
विभागले दिएको जानकारी अुनसार नेपालमा चालु आवको आठ महिनामा छिमेकी मुलुक भारत, पाकिस्तान र इथिओपीयाबाट आयात भएको हो । जसमध्ये सबैभन्दा धेरै भारतबाट ३५ करोड ९२ लाख ४५ हजार रुपैयाँ बराबरको बेसार र यसका कच्चा पदार्थ आयात भएको देखिन्छ ।
त्यसैगरि इथिओपीयाबाट १४ लाख ३३ हजार रुपैयाँ बराबरको १५ हजार किलो धुलो बेसार र पाकिस्तानबाट ११ लाख ३० हजार रुपैयाँ बराबरको १२ हजार किलो बेसार तथा यसका कच्चा पदार्थ आयात भएको विभागले जनाएको छ ।
वि.सं.२०७७ चैत २२ आइतवार १९:१५ मा प्रकाशित