काठमाडौं । नेकपा एमालेका नेता एवं बागमती प्रदेश सभाका सदस्य पशुपति चौलागाईंको कोभिडका कारण निधन भएको छ ।
पाँच दिन अघि कोभिड पोजेटिभ भई उपचाररत चौलागाईको अस्पतालमा निधन भएको एमाले नेता सुरेन्द्र पाण्डेले जानकारी दिएका छन् । पाण्डेले आफ्नो फेसबुक पेजमा नेता चौलागाईंको निधन भएको जानकारी दिएका थिए ।
दोलखा वैतेश्वर गाउँपालिका ४ स्थायी घर भएका चौलागार्इं नेकपा एमालेका पुराना नेता हुन् । नेकपा एमाले नवौं महाधिवेशबाट निर्वाचित केन्द्रीय सदस्य चौलागाईं २०७४ मा दोलखा प्रदेश सभा निर्वाचन क्षेत्र (ख) बाट निर्वाचित प्रदेश सभा सदस्य हुन् ।
२०२० फागुन २५ गते जन्मिएका उनी २०३६ सालमा दोलखा अनेरास्ववियुको संस्थापक उपाध्यक्ष हुँदै राजनीतिक यात्रा शुरु गरेका चौलागाईं नवौं महाधिवेशनबाट केन्द्रीय कमिटीमा निर्वाचित भएपछि पोलिट्व्युरो सदस्य एवं सहकारी विभाग प्रमख थिए । चौलागाईं २०४२ मा सानोठिमी क्याम्पसको स्ववियु सभापति, २०५४ मा प्रजातान्त्रिक राष्ट्रिय युवा संघको केन्द्रीय अध्यक्ष, २०५६ र २०७० मा दोलखाबाट सांसदमा निर्वाचित भएका थिए ।
चौलागाईंका श्रीमति, एक छोरा र दुई छोरी छन् ।
वि.सं.२०७८ वैशाख २८ मंगलवार २२:०९ मा प्रकाशित
