काठमाडौं । पोखरा महानगरपालिकाले पिच सडक पखाल्नको लागि एक थान ब्रुमर खरिद गर्ने भएको छ ।
महानगरले आगामी आवको लागि बजेट विनियोजन गर्दै अस्फाल्ट प्रविधिबाट गरिएको पिच सडक आवश्यकता अनुसार पखाल्न मिल्ने गरी कष्टमाइज गरिएको एक थान सवारी साधन र सोही सडक सफा गर्न १ थान ब्रुमर खरिद गर्न २ करोड ५० लाख रुपैयाँ बजेट विनियोजन गरेको छ ।
आगामी आवको बजेटमा जलकुम्भी हटाउन खरिद गरिएको साधनको आवधिक मर्मत संभार गरिने उल्लेख छ । महानगरले पूर्वाधार निर्माणको गुणस्तर परीक्षणको लागि स्थापना गरिएको प्रयोगशालाको स्तरोन्नति गर्ने जनाएको छ । प्रयोगशालामा यन्त्र तथा उपकरणहरु थप गरिने र यसलाई महानगरपालिकाको एउटा आम्दानी गर्ने एकाइको रुपमा विकास समेत गरिने उल्लेख छ । प्रयोगशालाको क्षमता विस्तामा १ करोड बजेट विनियोजन गरिएको छ ।
महानगरले बेगनासताललाई पृथ्वी राजमार्गसँग जोड्ने तालचोक बेगनास सडक नेपालकै नमूना सडकको रुपमा निर्माण गर्ने भएको छ । विश्व बैंकको आर्थिक सहयोगमा निर्माण भइरहेको सडकको लागि १ अर्ब ५३ करोड रुपैयाँको बहुवर्षीय बोलपत्र प्रकाशित भइसकेको जनाएको छ । उक्त सडक निर्माण भएपछि सो क्षेत्र पोखराको नयाँ न्युरोडको रुपमा विकसित हुने र तालचोक बेगनास क्षेत्रको भौतिक विकासको अलावा बेगनासतालमा हुने पर्यटकीय गतिविधि विस्तार भई उक्त क्षेत्र पर्यटकीय हबको रुपमा विकाशित हुने अपेक्षा रहेको छ । केन्द्रको सर्शत अनुदानबाट संचालन गरिने उक्त सडक आयोजनाको लागि आगामी आर्थिक वर्षमा २४ करोड २५ लाख बजेट विनियोजन गरिएको छ ।
चालु आर्थिक वर्षमा नै ठेक्का सम्झौता भइसकेका र आगामी आर्थिक वर्षको लागि प्रस्तावित कनेक्टिब सडकतर्फ गरी कुल १ अर्ब २० करोड रुपैयाँ बजेट प्रस्ताव गरिएको छ । सहरी तथा ग्रामीण क्षेत्रमा वडा कार्यालयहरुले तोकेको प्राथमिकताको आधारमा साना तथा छोटो दुरीका सडकहरु निर्माण गर्ने प्रस्ताव गरिएको छ । प्रतिवडा कम्तिमा एउटा सडक आयोजना पर्ने गरी उक्त बजेट विनियोजन गरिएको छ । प्रचलित कानुन बमोजिम जनसहभागिता जुटाइ उपभोक्ता समितिहरुले निर्माण गर्न सक्ने यस्ता सडक आयोजनाहरुको लागि आवश्यक बजेट विनियोजन गरेको छ ।
वि.सं.२०७८ असार १० बिहीवार १४:४९ मा प्रकाशित
