काठमाडौं । राष्ट्रिय सहकारी महासंघले सहकारीका कर्मचारीको लागि खोपको व्यवस्था गर्न गृहमन्त्री बालकृष्ण खाँडलाई आग्रह गरेको छ ।
महासंघको प्रतिनिधि मण्डलले गृहमन्त्री खाँडलाई यस्तो आग्रह गरेको हो । महासंघका अध्यक्ष मिनराज कँडेल सहकारीका कर्मचारीले खोप नपाएका कारण जोखिम मोलेर सेवा दिनु परेको जानकारी गराउनुभयो । उहाँले तत्कालै खोपको व्यवस्था गर्न समेत आग्रह गर्नुभयो ।
भेटमा गृहमन्त्री बालकृष्ण खाँडले सहकारीका कर्मचारीलाई प्राथमिकतामा राखेर तत्काल खोप दिने व्यवस्था गर्नका आवश्यक पहल गर्ने बताउनुभएको छ ।
उहाँले भन्नुभयो, ‘बैंक तथा वित्तिय क्षेत्र जतिकै महत्व रहेको र किसानसम्म प्रत्यक्ष जोडिएको सहकारी क्षेत्रलाई सरकारले खोपमा प्राथमिकता दिने छ ।’ सरकारले अहिले सबै जनताको स्वास्थ्यलाई महत्व दिएको बताउँदै संवेदनशिलताका आधारमा प्राथमिकतामा राख्दै खोप दिने योजना रहेको बताउनुभयो ।
‘नेपालको अर्थतन्त्रमा सहकारीको महत्वलाई यो सरकारले बुझेको छ’ उहाँले भन्नुभयो ‘सरकार सहकारीलाई महत्व दिएर अगाडि बढ्ने छ ।’
गृहमन्त्री खाँडले सहकारीको विकास र विस्तारका विषयमा आवश्यक छलफल गरेर अगाडि बढ्ने बताउनुभयो ।
उहाँले महासंघको सल्लाहकार समितिको बैठकमा आफू उपस्थित भएर आवश्यक छलफल गर्ने बताउनुभएको छ । गृहमन्त्री खाँडले सहकारीका कर्मचारी मात्रै नभएर कर्मचारी तथा सबै सदस्यलाई समेत खोप दिने व्यवस्था गर्ने बताउनुभयो ।
वि.सं.२०७८ साउन ५ मंगलवार १०:३७ मा प्रकाशित